Larangan adat kepada setiap pribadi

- Kok gadang jan malendo,
panjang jan malindih,
mahariak mahantam tanah,
bataratak bakato asiang,
nan babana kapangka langan,
nan batuak ka ampu kaki.

- Mangguntiang dalam lipatan,
manuhuak kawan sairiang,
malakak kuciang didapua,
manahan jarek dipintu,
mancari dama kabawah rumah,
mamapeh dalam balango.

- Pilin kacang nak mamanjek,
pilian jatiang nak barisi,
lain geleang panokok,
asiang kacundang sapik,
duduak sarupo urang kumanjau,
tagak saroman kamambali.

- Kacak langan bak langan,
kacak batih lah bak batih,
bak sibujang joloang babakarih,
bak sigadih jolong basubang,
lonjak labu dibanam.

- Geleang kapalo bak si patuang inggok,
sifat ibarat lipeh tapanggang,
tingkah ibarat caciang kapanasan,
bak baluik di galitiak ikua.

 =============================================================================